馬克思主義創始人馬克思 Karl Marx 出生於德國古城 Trier，曾經自稱為世界公民，在1848年涉嫌協助推動歐洲革命抗爭，嘗試顛覆政權但失敗收場，為此曾遭受普魯士(德國)政府以煽動武裝叛亂等危害國安罪名起訴，並先後被比利時、德國及法國驅逐出境，係一名思想激進嘅「黑暴分子」。馬克思在1849年8月以政治難民身份流亡到英國倫敦，最終定居在此直至1883年去世。雖然維多利亞年代嘅移民景況非常淒涼，佢7名子女中只得3個孩子能養活成人，但馬克思仍然堅持留低英國至死不渝，並冇回流。
馬克思到埗倫敦後落腳 Leicester Square 嘅德國人聚居地 German Hotel 與同胞圍爐，後來改為租住 Chelsea 區一所公寓，但大家都知道 Chelsea 有幾貴，冇幾耐馬克思就因為負擔唔起租金而被趕走 (點解唔使一次性交一年呢？)。最後一家五口再搬至 Soho 區 28 Dean Street 嘅一個三房單位安頓落嚟，一住就住咗5年。現時 28 Dean Street 地舖係一所名為 Quo Vadis 嘅餐廳，內有一間 Marx Room 可供包場租用。
馬克思時代嘅倫敦 Soho 並非今日嘅潮人浦點，而係龍蛇混雜嘅難民集中地，衛生情況極度惡劣，人口密度過高，疫症如霍亂嚴重，馬克思其中3名子女就係喺居住在 Dean Street 期間去世。而位於附近 20 Great Windmill Street 嘅 Red Lion 酒吧係當年由馬克思與恩格斯所領導嘅 Communist League 倫敦分部聚會地點，該組織在1848年發表咗兩人合著嘅共產黨宣言。馬克思經常流連 Soho，Red Lion 酒吧係佢嘅 local pub，但現已改為 Be At One 酒吧。
為咗脫貧同埋為家人開新篇，馬克思在恩格斯幫忙下學好英文，專心研究及寫作，經濟情況漸漸得到改善，在1856年終於可以離開 Soho 搬到環境較佳嘅 Kentish Town 一座8房大屋。縱使已定居英國，但馬克思一直繼續從事顛覆革命活動及勾結境外勢力，堅持打國際線去講好共產黨故事，因此入藉英國嘅歸化申請被拒絕。
馬克思於1883年在倫敦病逝，死時64歲。有咩想同馬克思講可以去 Highgate East Cemetery 搵佢，與一般拜山掃墓要在千篇一律嘅墓碑中眾裡尋她唔一樣，馬克思個陵墓你係一定唔會錯過嘅，上面有佢大大個嘜頭，不過就要買飛入場：
雖然口裏說不但身體很誠實，共產主義祖師爺馬克思寧願選擇在祟尚萬惡資本主義嘅帝國首都定居大半生，淪為二等公民都唔去背靠我哋偉大祖國建設 (清朝嘅) 大灣區。正如黃子華話齋，有好多事情都係講好過做，過分理想化嘅馬克思主義就係其中之一，只適合作為學術研究之用。除咗講，馬克思在倫敦時亦寫咗大量理論著作。曾被控煽動罪嘅佢應該特別珍惜出版及言論自由，相信冇諗過有朝一日佢嘅理念會與專制獨裁畫上等號。
在今日香港嘅新聞自由狀況回望馬克思生平，難免令人感到諷刺。若在座有爰国爰党嘅馬克思追隨者，希望唔好學小粉紅咁講一套做一套，如果有機會嚟到倫敦，記得去拜訪馬克思嘅史蹟。
https://www.facebook.com/UK.HongKong.Architect
https://highgatecemetery.org/visit/cemetery/east
No comments:
Post a Comment